حكايات الفارس العربى قبل الثوره 1بعنوان (الموظف بتاع كله)
دخل عبد الغفور غفر الله له الى مكتب السجل المدنى ليستخرج شهاده ميلاد لطفله الجديد سمير فقال
عبد الغفور/تسمح يا افندم عايز اطلع شهاده لابنى كمبيوتر
الموظف/(بغضب)اقف فى الصف يا حضره هنا كل حاجه بنظام مش هيصه
(ينظر من اسفل النظاره)ها عايز ايه بقى يا اخويا تطلع شهاده ميلاد لابنك ومالوا
عبد الغفور/والله يا بيه انا رحت استلمها من المستشفى قالو هاتها من السجل
الموظف/طبعا انت فاكر الدنيا سايبه كل حاجه ولها حاجه اسمه ايه
عبد الغفور/(متلعثما)سمير عبد الغفور الحاج
الموظف/ما شاءالله اسمه غلط يا اخينا
عبد الغفور/غلط لا ده ابنى هو انا مشعارف اسمه
الموظف/يا سلام عليكم لما تحبو تتفلسفوا وتحشروا نفسكم فى اللى مالكوش فيه
شوف يا سيدى الشهاده اللى معاك مكتوب فيه (سمير عبد الغفور الحيج)وعندى على الجهاز (الحاج)
عبد الغفور/يعنى ايه وانا مالى هو انا اللى كتبت
الموظف/يا حبيبى خلى بالك فيه غلط فى اسم العيله لازم تروح ترفع دعوى فى المحكمه
وتشوف محامى علشان القاضى يصحح لك الاسم ولما يجيى لنا الحكم وطبعا موت يا حمار نبقى نديلك الشهاده
عبد الغفور/يعنى ايه بقى الكلام ده
الموظف/هو كده
عبد الغفور ينظر حوله يقترب منه رجل يحمل اكوابا من الشاى
الفراش/ايه يا اخينا مالك مهموم كده
عبد الغفور/والله يا عم المساله (يسكت)ما تعرفشى ليه محامى كويس
الفراش/ليه محامى
عبد الغفور/اصل المسأله
الفراش/يقاطعه(هو قالك طبعا الاسم فيه غلطه والكلام ده ده راجل روتينى وعقدى هو احنا مضيعنا الا الروتين
والكلام الفاضى ده اعوذ بالله من دول موظفين
عبد الغفور/اه والله كلامك صح
الفراش/بص يا حضرت انت باين عليك ابن حلال شوف ان هخدمك لله
عبد الغفور/ربنا يكرمك يا شيخ احسن المدام هتودينى فى داهيه وهتعملى مصيبه
الفراش/لا انا ما يخلصنيش فتح مخك معايا شويه احنا فى زمن العولمه والنت وكله لازم يفتح مخه
عبد الغفور/ازاى يعنى
الفراش/الاستاذ امين يا ولداه عنده ابن فى المستشفلى بيعمل غسيل كلى يوميا
عبد الغفور/لا حول الله ربنا يشفيه
الفراش/لازم نقف جنب اخونا الاستاذ امين ونساعده ومن فرج عن اخيه كربه فرج الله عنه كربات يوم القيامه
عبد الغفور/صدقت والله طب اعمل ايه
الفراش/(يبتسم)تحط هنا على الصينيه دى ورقه بخمسين جنيه واديك بتساعد اخوك المسلم فى ازمته
ومشكلتك تخلص وتستلم الشهاده ولا محامى ولا محكمه ولا قاضى ولا ام سمير تزعل منك وتنكد عليك عشتك ولا حاجه
(عبد الغفور مستسلما امرى لله يناوله الخمسين جنيه ينتظر قليلا يعود الفراش ومعه الشهاده )
الفراش/اتفضل يا عم وادى الشهاده مبسوط
عبد الغفور/ربنا يكرمك يا شيخ
الفراش/كله فى ميزان حسناتك
يخرج عبد الغفور مبتسما فقد حصل على شهاده ميلاد ابنه
وهلل الفارس ليقول وقد خرج العم عبد الغفور ليلعن الروتين
والحياه اللى زى الطين والفساد اللى نخر فى المجتمعات
وما سلمشى منه لا قطاع خاص ولا حكومات وبقت الموضه داخل الاوضه والرشوه بقت اكراميات
والعوض على الله فى ناس عايشين على المعونات)انتهى
لحكايه الثانيه(عبد البديع ومجلس الهيصه)
تكلم الفارس العربى مندهشا لتابعه :
(شفت يا واد يا صبحى ايه اللى حصل مع بديع ابن خالك ؟!
عبد البديع عامل فيها ناصح اصله مصاحب الواد صالح اللى عامل فيها وزير وهو ميعرفش انه واطى وحقير اوطى من فرده الشبشب اللى فى رجليك .......... بس هيه كده الدنيا يوم لك ويو عليك
رد الواد صبحى :
ايه بس اللى حصل يا بيه يا جيم يا حه يا تيه )
اسمع يا واد الحكايه وما تعلقشى غير فى النهايه
دخل بديع انتخابات مجلس الهيصه زى غيره كتير.. مانت عارف ان الديمقراطيه مبتفرقشى بين غفير ووزير
صبحى : اه احنا فى زمن النفس الطويل والحريه والعولمه
الفارس : باع الفدانين وبقى ينتش شمال ويمين
نهايته نجح وعملولوا حفله طهور
\صبحى : طهور ليه هو كان لسه...؟؟؟
الفارس : المهم بقى سياده النائب كبير وعايب ومحدش عارف يلمه
صبحى : ازاى مش فاهم فهمنى يا كبير...!!!!
الفارس : عايز يعوض الفدانين والعيشه اللى زى الطين سرق ونهب ونصب وكدب ودلوقت عنده مصانع بعد ما كان جربوع وصايع
صبحى : مصانع ما تشغل الواد ابن اختى عنده اتوسطله ما هو عارفك
الفارس : وبقى بيسافر بلاد بره فرنسا مره ومره ايطاليا وبيجى فى التلفزيون وبيتكلم فى السياسه والقانون
صبحى : يا سلام بقى سياسى يعنى ؟؟!!
الفارس : امال يا واد .. !!! وداير يلف فى البلاد ايشى هدايا لده وشهاده لده ومن ده على ده
صبحى : بقى مرتشى وحرامى يعنى ...؟؟؟
الفارس : وماله ما اللى قبله كانوا زيه ومحدش فى البلد بقى قده ..
كبير وصغير بيعملولوا حساب ويقفولوا بالطابور على الباب اصله بيوزع اعانات وزى ما قال احمد رجب اللى امه دعياله يدخل مجلس الشعب كل يوم يبيضله بيضه دهب من غير عناء ولا تعب
صبحى : بس الكلام ده مش حرام.؟؟
الفارس : هو حد النهارده عارف مانت معايا وشايف حال الناس والبلد الرقاصه فى شارع الهرم بتكسب فى الليله الافات والغلابه بيموتوا كل يوم م الجوع الوفات
صبحى : ايوة عندك حق مفيش عداله فى توزيع الثروات
\الفارس : ماشاء الله يا صبحى عليك بقيت مثقف
صبحى : وبعدين .........
الفارس : ولا قبلين
وانتهت عمليه فرز الاصوات وحكمت المحكمه بلا مقدمات الكل حرامى ومزور وديناصور الطمع عمال بيكبر والفاتحه على قله الاصل اللى ماتت اهى ايام مرت بسلام ويلى بقى حسن الختام حكايات الفارس العربى()
3(رجل الاعمال ومسؤل الاملاك)
محدش واخد باله يا سيدى دى مجرد هديه عشان محمود(بنفس الكلمات اتكلم مسئول الاملاك مع حوت سرقه اراضى البلاد والعباد)
رجل الاعمال : هنفتح هنا شركه استثمار وكمان مصانع للكبار والصغار وهنخدم الوطن
مسؤل الاملاك : اللهم صلى على النبى ده شىء عظيم
رجل الاعمال/خلى بالك يا استاذ مدكور احنا معندناش رشاوى ولا محسوبيات كله بعمله والشغل عندى بالساعات اللى هيشتغل كويس هياخد علاوات احنا مبنظلمشى حد ..!!!
مسؤل الاملاك : بس لازم سعادتك ناخد راى المحافظ !!
رجل الاعمال : لا متخافشى المحافظ انبسط على الاخر وكله تمام
مسؤل الاملاك : يعنى ايه سعادتك ؟؟؟
رجل الاعمال : يعنى الارض واسعه هما بس 100الف فدان هنخدم بهم الفلاح الغلبان والشباب العاطلان ونحل ازمه اللى ما تتسمى السكان ونساعد على العمل والانتاج والفلاح ونساهم مع الحكومه فى الاصلاح لان ايد لوحدها ما تسقفشى والبلد من غير قدرات شبابها المتعلم ما تنفعشى
مسؤل الاملاك : مظبوط الكلام
رجل الاعمال : والمتر زى ما انت عارف بعشره جنيه
مسؤل الاملاك : عشره جنيه من قال كده
رجل الاعمال : لا متقلقشى معمول حسابك وحساب اللى زيك انتم بتخدموا الوطن هنحجزلك شقه سبع اوض بتطل على البحر وجنينه جميله تزرع فيها الورد والياسمين وهتبقى الاشيه معدن يا عم هيص وهنشغل عيالك فى مصانعنا نعلمهم فى مدارسنا وهنريحهم اخر راحه انتم بتساعدونا عشان نخدم الشعب والوطن
مسؤل الاملاك : والله يا افندم تبقى عملت فيه جميل لو تشغلنى معاكم اصل المرتب مابيكفيش والحياه غاليه وعندى سبع عيال وامهم والعمليه ضنك خالص
رجل الاعمال : لا اطمن خالص متحملشى هم هتشتغل المستشار بتاعى
مسؤل الاملاك : الله يسترك يا بيه دا الست بتاعتى هتفرح خالص
رجل العمال : شوف يا استاذ مدكور طول ما انت ماشى معانا مظبوط هنعمل لك اللى انت عايزه وزياده كمان
مسؤل الاملاك : ماشى يا بيه انا خدام سعادتك
وتمر الايام ويشترى رجل العمال ال100الف فدان برخص التراب ويبيعها للاجانب بالملياارات
(وصرخ الفارس العربى لتابعه قائلا)
شفت يا صبحى اللى حصل
صبحى : شفت ويا ريتنى ما شفت
الفارس : البلد اتباعت برخص التراب وارض الشعب بيسرقها الاجانب واصحاب الملايين والناس مش لاقيه العيش والبنزين ولا نافع معاهم لوائح ولا قوانين والغلابه لو قعدوا فى ارض ملك الدوله يتجرجروا على السجون والكبار بيسرقوا عينى عينك والحكومه مأيداهم وبتبيع لهم والشباب العاطل فى ثانيه يبقوا مجرمين ونسمع عن واحد انتحر وبقى من الكافرين عشان مش لاقى ياكل هو وعياله والكبار بيسرقوا ارضه وماله لا جواز ولا شغل ولا عيشه كريمه
صبحى : والعمل ايه دلوقتى يعنى
الفارس : قول يا واد يا صبحى بعلو صوتك لعنه الله على الظالمين
رد صبحى والله انا تهت مانى عارف ايديه الشمال من اليمين
4(ويكلكس والرحيل الى موزمبيق)
الفارس العربى/يفتح الجريده الواد ويكلكس ده خرب الدنيا خالص وفضح العالم كله ايه الحكايه دى
صبحى/يا زعيم ده واد همام عال العال وتمام فتش السر والعمليه بقت تمام وبقى وش امريكا اسود من قرن الخروب
الفارس/عندك حق العمليه هاصت على الاخر
صبحى/بس يا ترى الكلام ده صحيح الواد ويكلكس ده شكله مريح
الفارس/حد عارف اهى اسرار بتتقال
صبحى/الغريب انه امريكانى ومشخايف ده كمان محدش اتعرضله بس فضحنا وبقينا هباب
الفارس/ده مخلاش مصر والسعوديه وليبيا والامارات وكل الدول العربيه انكشفت
صبحى/دول عميله احنا فى غابه وشعوبنا مظلومه ومش دريانه بحاجه
الفارس/بقينا عريانيين فى ثوانى والحكام اتلجموا وبانوا
صبحى/بس والله الاجانب دول عندهم حريه ومعندهمش خوف زينا
الفارس/عندك حق وبيطبقوا القوانين صح لا تلاعب ولا دياولوا
صبحى/وبيحاكموا حكامهم من غير حساب واحنا بنترعب من غفير
الفارس/ده الواد بيرلسكونى بتاع ايطاليا فضحوه وبهدلوه فى المحكمه
صبحى/والواد ساركوزى بهدلوه ودفعوه غرامه قطمت وسطه عشان خد شقه مش من حقه
وخدوا منه الشقه ورموه فى الشارع
الفارس/مش عندنا هيموتوا فى الكرسى ويحاربوا عشان الرئاسه ويزوروا الانتخابات ويضحكوا على الشعوب واللى يعالرض يا المعتقل يا السجن يا يتشرد هو وعياله
صبحى/والنبى اسكت يا زعيم دنا كلت ضرب وانا فى القسم الاسبوع اللى فات
الفارس/ايه اللى حصل
صبحى/رايح اعمل محضر بطاقتى ضاعت وقفونى فى الدور ونزلوا فيه سب وشتم وقال ايه عليه حكم واتبهدلت والاخر طلع تشابه اسماء
الفارس/ضحكتنى يا مضروب
صبحى/تمشى فى الشارع تتلفت وراك لا تنسرق حتى الجوامع مليانه مخبرين وحراميه وقطاعين طرق شبشبى اتسرق عشر مرات واروح حافى زى العيال
الفارس/وتدخل اى مصلحه لازم تدفع من الغفير اللى على الباب لحد المدير اللى قاعد فى التكييف
صبحى/امال البلد كلها فساد وامر واقع
الفارس/ولا نافع خطب وجوامع ولا نافع اى كلام
صبحى/كله بيدن فى مالطه
الفارس/والفلوس مع التيوس الحراميه النصابين المغنى الفلانى بياخد فى الليله مائه الف جنيه
صبحى/فى الليله كام
الفارس/100الف جنيه
صبحى/ليه بيعمل ايه ده صايع مايع تافه
الفارس/هيه كده مشعاجبك اشرب م البحر
صبحى/دنا بتعب وبتطلع روحى والشهر ما بحصلشى الف جنيه
الفارس/انت تافه يا صبحى لكن دول مشاهير البلد لازم ياخدوا الافات لانهم بيسعدوا الناس
صبحى/بيضحكوا على الناس تقصد
الفارس/وغيرهم بتوع الكوره بياخده بالملايين
صبحى/ده ايه الظلم ده واحد ينتحر عشان رغيف العيش والتانى بياخد فى الليله مائه الف جنيه
الفارس/ربك يهون
صبحى/احنا نسيب البلاد العربيه دى خالص
الفارس/نروح فين يعنى
صبحى/اصل كلها زى بعضها حكام فاسدين وشعوب نايمين وكل يوم الحكايه بتزيد البله طين
الفارس/ايه رايك نروح موزمبيق
صبحى/بلد غريب وجديد هما دول مسلمين يا زعيم
الفارس/يعنى خدنا ايه م المسلمين اديك شايف بيدبحوا بعض والفساد نخر فيهم والعمليه هاصت خالص
صبحى/على رايك دول بيتخانقوا على دخول الحمام باليمين والا الشمال وكل واحد عامل نفسه علامه زمانه
الفارس/الجماعه السود دول قلبهم ابيض احنا نجربهم ونعيش بينهم
صبحى/موافق اهو تغيير جو وتغيير دم
(وقرر الفارس العربى وصبحى ان يتركوا البلاد العربيه ويذهبوا للعيش فى مرتفعات موزمبيق الابيه وبين غابات الامزون يتزحلقون ويلعبون مع اخواتهم السود زوات الاسنان البيض الطوال القامه زوات الرجوله والشهامه ويبعدوا عن الفساد والمفسدين جنب اخواتهم المسلمين المتفرقين المختلفين المشتتين )
ونكمل الحلقه التاليه فى موزمبيق 5 (من وحى موزمبيق)
وقف الفارس العربى حزينا اما مياه النهر الملوثه بالقاذورات وقال
الفارس/عارف يا واد يا صبحى احنا عايزين ايه
صبحى/ايه يا زعيم
الفارس/امريكا تحتلنا وتدخل بلادنا بجد مش تعمل قواعد عسكريه وبس لا دى تحكم كمان ويجيبو لنا حكام من بره من فرنسا وايطاليا والبرازيل احنا زهقنا من حكامنا والنظام اللى ماشيين بيه مش عجبنى خالص
الفارس/العمليه هتبقى ميه ميه وهتزهزه على الاخر
صبحى/ازاى بقى بلادنا محتله والغرب فيها بيحكم وهتزهزه
الفارس/اه عارف ليه
صبحى/ليه
الفارس/اول ما امريكا تحتل بلادنا العربيه هتلاقيهم اتوحدوا وبقوا ايد واحده وفكر واحد وقلب واحد ومش كده وبس وهتلاقى العيال اللى عمال يتكلموا هنا وهناك فى الدين بانوا على حقيقتهم وهتلاقى الناس بدور لها على زعيم تمشى وراه عشان يحررها من الاحتلال وهتلاقى الشعب كله بيقاوم المحتل وله هدف والخير هيعم على الكل والناس هتلاقى شغل والبنات هتجوز والعمليه هتبقى ميت فل واربعتاشر
صبحى/والله جايز كلامك فيه شىء من الصح
الفارس/ولا هتلاقى سجون ومعتقلات وامن دوله ولا هتلاقى نفاق وكدب وفساد وكله هينتهى وهتلاقى كلام العلماء مسموع والعلماء هيتوحدوا ويبقى لهم عالم واحد امام واحد يمشوا وراه والشعب بعدهم مش النهارده كل واحد يقول فتوى ما تعجبش التانى يكفره ويلعنه ويقول عليه عبيط وميعرفشى الالف من كوز الدره
صبحى/والناس هتزرع وهتبنى والارض واسعه والحق بقى يرجع لصحابه وكل واحد عند ه فكر حضارى هيقولوا وعنده مخطط تكنولوجى او بحث علمى هيلاقى اللى يعبره والناس اللى سرقوا البلد والشعب هيتعدموا وناخد منهم اللى نهبوه بس يا زعيم انا مشمعاك فى حكايه التغيير بالقوه ابدا يعنى لازم امريكا تحتلنا
الفارس/يا عبيط ماهيه محتلانا بس انت مشعارف حاجه كل حاجه فينا امريكانى حتى الفار والقطط امريكانى امريكا دخلت واحتلتنا فكريا من زمان واتحكمت فينا بمزاجنا طب وليه بقى ندارى على بعض فضيحتنا خلاص بقى ناقص ايه تزاحمنا فى حياتنا وعيشتنا احنا موافقين
صبحى/على الاقل هنلاقى حريه راى وفكر وناس تعرف هيه عايزه ايه ونقضى على الفساد وانعدام العداله
الفارس/يا سلام يا واد يا صبحى لما تشغل دماغك تيقى علامه زمانك ايه ده انا قاعد قدام مفكر عبقرى وانا مش دارى
صبحى/العفو با زعيم هو انا اجى ايه فى بحر فكرك
الفارس/وكمان متواضع ايه الجمال ده
صبحى/على الاقل دول ناس بيفهموا مش زى البقر اللى عندنا
حكم احنا عندنا شويه بهايم وعاملين نفسهم مفكرين شفت الراجل الحمار اللى بيقول عادى جدا الولد يبوس البنت فى الشارع والا الجماعه الحريم السعوديين اللى عاملين اضراب قال ايه ان ما كنتش الحكومه هتخليهم يسوقوا العربيات بتاعتهم هيرضعوا السواقين بتوعهم عشان يبقوا اخواتهم من الرضاعه شوف المسخره وصلت لفين
الفارس/ماهى دى الموضه يا صبحى
صبحى/يعنى انا ممكن بقى ارضع من ثدى ام على
الفارس/مين ام على دى يا واد
صبحى/ست كده بتيجى عندنا تخدم على طول
الفارس/لا طبعا الكلام ده فارغ حتى ما يدخلشى العقل
صبحى/على رايك الناس بيستغلوا الدين وفال ايه بيتشعلقوا فى الحديث قال عشانه جه فى البخارى
الفارس/احنا مالنا يا صبحى دول عالم فكرهم منحرف ربنا يسترها
صبحى/والا الجماعه بتوع البهائيه دول
الفارس/اه دول بيطالبوا بتغيير البطاقه وعاملين لهم زعيم ودين شوف الكفر يا اخى
صبحى/الغريب ان البلد بتدافع عنهم
الفارس/امال دى حريه يا صبحى انت متعرفشى فى الساسه والا ايه
صبحى/حريه ايه وتراب ايه دول مفروض يعدموهم
الفارس/والا الجماعه اللى بيسكروا طول الليل ويتمسحوا بالولىهناك فى الحسين شفتهم
صبحى/اه ياه دول كانوا كتير زى النمل
الفارس/دول اغبياء وجهله وضيعوا الدين وبوظوا الدنيا خالص
صبحى/منهم لله
الفارس/والا الجماعه اللى بيطلعوا فى التلفزيون بيشتموا فى بعض وكل واحد يا اخويا عامل نفسه امام وله اتباع
صبحى/ما هو ده يا زعيم الحداثه واستغلال ثوره المعلومات
الفارس/الله عليك يا مثقف
صبحى/والا الجماعه اللى بتعارض الحكومه عالم عندها هبل
الفارس/دول مش معارضين دول قابضين وبيضحكا على الشعب
صبحى/يعنى العمليه باظت خالص ومفيش امل
الفارس/الامل فى ربنا كبير وكل شىء بالصبر
الفارس/واد يا صبحى اظاهر الناموس هنا فيه سم خلانا نخرف ونقول حاجات مش راضيين عنها
صبحى/مش انت اللى قلت نروح موزمبيق ادينا فيها والراجل الاسمر الاهبل ده كل ساعه ينش بالمنشه لما الناموس هرانا
الفارس/بس موزمبيق هاديه والناس اللى هنا طيبين وعندهم كرم زايد ده لبما عرفوا اننا مصريين رحبوا بينا خالص
صبحى/اه بس المشكله عندهم عصابات الليل انا امبارح اتقلبت وسرقوا شرابى والطاقيه الصوف اللى جابهالى ابويا الله يرحمه
الفارس/لا يا شيخ
صبحى/امرنا لله هنعمل ايه بس اهو تغيير جو
الفارس/بس دول مثقفين قوى وبيحبوا زعمائهم شفت صور مانديلا ماليه المحلات هنا ازاى
صبحى/امال ده مين مانديلا ده يا زعيم
الفارس/ده رئيس جنوب افريقيا السابق وكان ثورجى وحرر البلد وكافح وحارب البيض والتفرقه العنصريه لحد مالشعيب ادمنه وانتخبوه رئيس لهم
صبحى/راجل عظيم فعلا
(وغط الفارس العربى وتابعه فى نوم عميق بعد حديث شيق ومشوق داخل تلال اختنا الحبيبه موزمبيق)
6 (مفيش فى القانون زينب) نادىى الحاجب على القضايا بالمحكمه قائلا
عبد السلام الزحلف
نادى عبد السلام
ايوه يا افندم(نادى عليه العسكرى الواقف بجوار الحاجب لتنظيم الجلسه المنعقده رئاسه المستشار سد الحنك
اخلص يا متهم بلاش تلاكيع
القاضى/انت عبد السلام الزحلف
عبد السلام/ايوه يا افندم انا
ليه مزعل منك مراتك وعيالك ومبتصرفشى عليهم ده اسمه كلام يا راجل
عبد السلام ناظرا لمحاميه
المحامى/يا افندم الحاج عبد السلام يعرف ربنا كويس وبيصرف على عياله بانتظام وجنحه التبديد دى معموله نكايه فيه ومن غير وجه حق
القاضى/ايه رايك فى الكلام ده يا زينب
زينب/(تبكى)والله يا بيه مبيصرفشى علينا بقاله 3سنين وحلمنا من اللبس والاكل ومبيدخلشى اللحمه البيت والعيال نفسهم فى اللحمه واما يعدوا على الجزار اللى فى اخر الشارع الواد رضا يتنطط ويتشال وينحط هيموت نفسه نفسه ياكل لحمه ده بقى طول الليل يهوهو زى الكلاب لما الجزار عطف عليه ورماله حته شغته
(العيال تتعلق بامهم من الصراخ والدموع تملا عيونهم مرتدين ملابس قديمه باليه مقطعه")"
المحامى الخاص بزينب/نطالب المحكمه بتوقيع اقصى العقوبه على المتهم اللى شرد عياله وضيعهم وشتت شملهم الظالم الجبار قاسى القلب اللى رماهم وراح اتجوز على امهم عشان يشوفلوا يومين ومارعاش لا دين ولا اخلاق
عبد السلام/انا اتجوزت وده حقى يا بيه والكلام ده كلام فارغ ومحصلشى (يدخل يده فى جيبه )وادى الف جنيه لعياله دى تمثليه عاملينها عليه لاستبزازى وعشان يمصوا دمى
القاضى/بطل يا عبده انت هتخبط دى برده مراتك ام عيالك ودول عيالك وملزمين منك انفاقا ورعايه
عبد السلام/يا افندم هو القانون معمول ومتفصل عشان زينب بس تخرب بيتى وتحبسنى اوطنطا انا هتجوز تالت وتبقى تولرينى هتعمل ايه هجيب وداد وسعاد انا راجل مقتدر وهصرف عليهم كلهم وما دام زينب دخلتنى وجرجتنى فى المحاكم (ناظرا لزينب)انت طالق يا زينب وعمرى ما هنحبس فى مره ابدا
القاضى/ايه اللى انت عملته ده انت حمار
عبد السلام/يا افندم دى تمثليه معموله عشان استغلالى بحجه العيال طب عيالى وانا عايزهم وهصرف عليهم زى ما انا عايز(زينب اغمى عليها )وبعدين يا افندم مفيش فى القانون زينب
(المحمه تضحك وزينب تصرخ
زينب/طلقتنى يا عبده طب وحياتك لاوريك وهجرجرك فى المحاكم وهمص دمك ايشى نفقه ومتعه وسكن وحضانه دنا القانون فى صفى
عبده/وانا ههدلك القانون ده بفلوسى وهخطف عيالى وطظ فى مؤخرك وقايمتك ونفقتك هدفعهم على البلغه القديمه
القاصى/ايه اللى انا بسمعه ده هيه سوق بس انت وهيه عسكرى حطهم فى القفص
محامى عبد السلام/احنا اسفين يا افندم لسعادتك
محامى زينب/معلشى جنابك احنا اسفين
محامى عبد السلام/نطلب من المحكمه التاجيل للصلح
المحكمه/22/1/2011للصلح بره كلكم
(والتفت صبحى للفارس العربى ايه ده يا زعيم ده العمليه بقت نون لا نافع قضا ولا قانون وفترت الحريم قال الفارس يابنى ياصبحى احنا فى زمن النسوان والراجل بقى غلبان والمراه دخلت البرلمان وزاحمت الراجل فى كل مكان ولما بيخلف يتخنقه بايديها ولما تكتر همومه تركب وتدلدل رجليها ووطول ماهو قدامها وفى بيتها تحبه سليم ومصحصح ولما بتموت بيطلعله عفريتها وطول النهار عيزه وعايزه بير ما بيخلصشى ولو عمل لها ايه ما بينفعشى
والناس معاها والقانون وراها والسلطه فى ايديها وزى ما قال عمك تعيلب مفيش فى القانون زينب)
7(درس خصوصى) وقف الطالب امام مدرسه العصبىس/شوف يا اسماعي لنازم تاخد درس خصوصى عندى عشان تنجح فى الرياضه
الطالب/حاضر يا افندم
المدرس/وبعدين شوف كام طالب معاك كده يعنى فتح مخك معايا عشان تبقى الكومندا
الطالب/ماشى يا استاذ
المدرس/انت واد عسل يا اسماعين وبحبك وهتنجح هتنجح ذاكرت ما ذاكرت برده هتنجح المهم شد حيلك
الطالب/يا استاذ الواد خيرى ابوه جزار ومحمود ابوه تاجر
المدرس/ايوه دول تمام هاتهم معاك وانت تاخد درس ببلاش وتبقى كومندا كمان على الاقل ناكل لحمه ببلاش ونجيب طلبات البقاله اونطا ومين تانى يا سومعه
الطالب/حموده ابن الدكتور مفيد وعلى ابن بهانه
المدرس/بهانه مين بهانه دى يا واد يا مضروب
الطالب/دى معلمه فاكهه وعندها شنيش وبتاجر فى الموز
المدرس/يا سلام هوه ده الكلام يلى بقى يا بطل اشتغل وابعت العيال دول والحصه بعشرين جنيه
الطالب/(ضاحكا)ولحمه وموز وسمنه وسكر وزيت ببلاش اى خدمه يا استاذ
المدرس/اه والنبى يا سومعه اصل الدنيا غاليه والاسعار مولعه نار وزى ما انت عارف المرتب مشمكفى
الطالب/لا دى هتروق وتحلو على الاخر بس انت وعدتنى ابقى الزعيم على الفصل والدرس
المدرس/امال وتاخد درس ببلاش كمان ومشمهم هتنجح هتنجح عافيه انا ليه بركه الا انت يا سومعه
الطالب/اصل الرياضه دى صعبه قوى ومشفاهم فيها حاجه
المدرس/ومين سمعك المواد كلها معقده ووزاره هايفه والتعليم باظ
الطالب/وبعدين اخرت التعليم ايه كلام فارغ
المدرس/على رايك هتعمل ايه بالشهاده يعنى
الطالب/هعلقها واعيط جنبها
المدرس/على رايك البلد دلوقتى مع الجنيه من غيره ما تساويش
الطالب/ده الواد رافت بيكسب فى اليوم الف جنيه
المدرس/كام ليه بيتاجر فى البودره
الطالب/لا بيشتغل سمسار اراضى وعربيات وخلافه تجاره حلال
المدرس/خدنى شغلنى معاه ينوبك ثواب والا يشوفلى شقه اصل الشقه اللى انا عايش فيه اوضدتين وصاله ومشنافعه اصل العيال كتير بنام فوق بعض
الطالب/هقوله بس على الله يوافق
المدرس/كمان ممكن ما يرضاش
الطالب/هحاول اقنعه
المدرس/هو معاه ايه
الطالب/ساقط اعداديه
المدرس/يعنى بصمجى
الطالب/هو انت تطول تبقى زيه يا استاذ
المدرس/على رايك ده راجل اعمال
الطالب /عن اذنك بقى يا استاذ هروح اتغدى اصل امى النهارده دابحه لنا ديك وبطتتين
المدرس/ايوه يا عم
الطالب/اصل اخويا ايمن عيان والدكتور قاله ياكل ديك ويشرب الشوربه بتاعته
المدرس/ربنا يشفيه المهم اوعى تنسى التعليمات عشان اظبطك
الطالب/مشى يا استاذ انا خدامك
(والتفت صبحى الى الفارس صارخا التعليم باظ والبلد باظت وكله بقى بالجنيه اه يا حراميه يا اولاد الايه رد الفارس عليه يا صبحى يا اخويا خليك معايا الدنيا اتغيرت معاك فلوس تساوى فلوس ولو ممعكش هتعيش منحوس وخايب الرجا ومتعوس والشاطر فى الزمان ده اللى يعرف يجيب الجنيه لا تقولى اخلاق ولا ضمير اصل الفلوس بقت مع الحمير وربنا يعدى ايامنا الجايه على خير وان كنت موافقه وناوى بيع ضميرك لا تبقى حمار حصاوى فى زريبه هيربطوك وليل ونهار يعلفوك ))
8(صنع فى الصين) صبحى/ /(بحزن واسى وتعجب)انا يا زعيم حزين قوى ومضايق
الفارس/ليه يا صبحى عاش من زعلك
صبحى/رحت اشترى من السوق لبس الشتا للعيال كالعاده كل حاجه يا اخويا مكتوب عليه صنع فى الصين
الفارس/
عادى هو انت مش فى الدنيا
صبحى/امال احنا بنعمل ايه
الفارس/احنا مين
صبحى/العرب المسلمين
الفارس/لا احنا بلاد مستهلكه بس بننضرب على قفانا ونسكت بنحب النوم والراحه
صبحى/يا زعيم ده حتى المعالق والسكاكين والشرابات والفلنات وحاجات الحريم والرجال كلها صناعه صينيه
الفارس/والغسالات والتلاجات والبوتاجازات وكل ادوات المعيشه صينيه
صبحى/*دول ولاد ابالسه
الفارس/يا صبحى الايد البطاله نجسه
صبحى/على رايك امال هما وصلوا وبقوا اكبر قوه اقتصاديه وعسكريه ازاى
الفارس/رغم انهم مش مسلمين يا اخى بيعبدوا واحد اسمه بوزا
صبحى/بوذا مين بوذا ده يا زعيم
الفارس/ده راجل عاملينه نبى وله كتب وكلام زى كده يعنى تقدر تقول الامام بتاعهم
صبحى/ياه دا الصين دى مليار نسمه ورغم كده يا زعيم ما عندهمشى بطاله امال بيقولو السكان وزياده السكان سبب فى البطاله ازاى
الفارس/ده شغل نصب على الشعوب احنا حكوماتنا لقيتنا بنحب النوم والراحه والكسل ضحكوا علينا بحكايه السكان دى طب م الصين مليار والهند مليار واكبر دولتين فى التقدم والرخاء
صبحى/امال ايه مشكلتنا بقى
الفارس/مشكلتنا غسيل الدماغ والروتين والفساد والرشاوى وانعدام العداله وتوافق الفرص والتكافوء وعداله توزيع الثرؤوه والسره ونهب البلاد والعباد والماده اللى طغت على الناس وانعدام الاخلاق والتميع وحب الذات ونسيان الحضاره وعدم الاخذ بالاسباب والعماله وحب التسول وكبت الحريات وعدم النظام
صبحى/ياه كل ده امال فين دور رجال الفكر والاصلاح ورجال الدين
الفارس/موجودين بس زهقوا واتخبطوا وتعبوا واتفعتشوا وكله كلام فى كلام عشان مفيش نيه ولا عزيمه للتغيير وكل واحد بيقول يلى نفسى
صبحى/عمرى ما شفت حاجه مكتوب عليها صنع فى مصر او سوريا او السعوديه
الفارس/سعوديه ايه يا بنى دول بلد مستهلكه نايمين وبيشتروا الناس بفلوسهم
صبحى/بس خلاص ماعدتش يملكوا حاجه
الفارس/على رايك بترولهم خدته امريكا ببلاش وشعبهم بقى بيشحت فى الشوارع
الفارس/لانهم ظلموا فربنا دمرهم
صبحى/لانهم خانوا وغدروا ومشيوا ورا الهيصه
بس الصين دى يا زعيم بلد عظيمه
الفارس/طبعا
صبحى/انا هتجوز واحده من الصين واعيش هناك
الفارس/واذكياء وبيعرفوا يحلوا مشاكلهم بسرعه وحكمه
صبحى/انا شوفت اتوبيس باربع ادوار
الفارس/شوفت بقى ده حل لازمه المواصلات
صبحى/وشفت الاطفال بيشتغلوا وبيبيعوا فى الشوارع
الفارس/ودى حل لازمه البطاله كن عمليا تملك قوت يومك
صبحى/والشباب عندهم مخترغ
الفارس/بيشجعوا البحث العلمى
صبحى/وشفت بينتجوا كل حاجه من الابره للصاروخ واسعار رخيصه
الفارس/سياسه جباره انتج كتير وبيع رخيص تكسب وتنمى انتاج وطنك ويبقالك كرامه
صبحى/دول فاضل يصنعوا لنا عيل صينى
الفارس/امال اهم جم مصر بيبيعوا ويشتروا
صبحى/دول بيروحو دول العالم بيبيعوا ويشتروا ويكسبوا
الفارس/عمليين الصناعه والقوه الاقتصاديه عايزه العمل والانتاج
صبحى/بس انا لو اتجوزت واحده من الصين لازم تبقى مسلمه
الفارس/والله مش لما ترضى بيك ده انت مصرى عدمان تافه
صبحى/لا ما انا هبقى صينى وهلبس لبسهم وهبقى زيهم
الفارس/ممكن لو تزوجت صينيه هتدخل الاسلام بسرعه وهتبقى مسلمه لانهم مشمهم الديانه عندهم
صبحى/بس انا خايف يا زعيم
الفارس/من ايه
صبحى/لا تتعلم الكسل والنوم وتبقى عاله هى كمان وتودينى فى داهيه
الفارس/لا متخفشى بس انت عيش عندهم احسن فى الصين
صبحى/تمام هعمل كده وهروح من بكره الصين
الفارس/ابقى سلملى على هو جين تاو
صبحى/مين تاو ده كمان
الفارس/ده يا جاهل رئيس الصين
صبحى/اسمه تاو والله اسمه جميل ودمه خفيف
الفارس/ده رئيسك الجديد
صبحى/وةمالوا ده باين عليه راجل محترم
الفارس/امال ده صنع القوه والعزه للصين فى اقل من عشر سنوات
صبحى/امال احنا مشكده ليه
الفارس/يا ابنى انسى بقى قلتلك احنا هنفضل شحاتين على طول بياعين كلام كل واحد بيبيع الكلام على التانى
صبحى/عايز حاجه يا زعيم انا هروح الصين هبقى صينى يعنى هبقى صينى
الفارس/ربنا معاك يا صبحى يا اخويا
(وقرر صبحى ان يرحل الى الصين وزهق من العيشه اللى زى الطين والجهل والغباء اللى هنا وصنم جديد اسمه الروتين وقرر الزواج من فتاه صينيه بشرط تكون بيضه وحلوه وعمليه ومش بعيده بعد سنه او اتنين نلاقى صبحىهناك بقى وزير التموين ويبعت لنا معونات ببلاش من سكر وزيت ولحوم ونهتف باسمه عاش صبحى عاش
ونعمله تمثال بدل تمثال رمسيس ونحجمه بالمتاريس ويطلع فى الجرايد والمجلات ونحمد ربنا ان فيه واحد مصرى بقى بينعمله اشعار ومسلسلات محرر الشعوب من الفقر والجوع والفساد والخرافات)
8(ام عيسوى)
صبحى ناظرا للفارس بغضب
صبحى/انا شكلى هنطرد من البيت وانام فى الشارع
الفارس/ليه يا بنى انت معقدنى كده على طول انا قلت انك اتجوزت واحده صينيه وهتبقى ميه ميه
صبحى/كله من الست ام عيسوى
الفارس/مين ام عيسوى دى كمان
صبحى/ست من الصعيد وبقت ايه عضوه بالبرلمان وكيوتا واخداها مثلها الاعلى
الفارس/هيه مراتك اسمها كيوتا ده ايه الحلاوه دى
صبحى/كيوتا اليومين دول طالعالى فى المقدر جديد
الفارس/يعنى ايه
صبحى/اصلها معجبه قوى بام عيسوى وليل نهار تقرالى فى كتب عن حريه المراه وكلام فارغ عن حقوق الانسان
الفارس/والله عال بقى انت بتهرب من مصر عشان اللى فيها تلاقى مراتك الصينيه بتقلد اام عيسوى المصريه ده شىء يجنن
صبحى/اصل ام عيسوى ست مكافحه كانت بتبيع طماطم وبعدين انجنت ودخلت مجلس الشعب ونجحت طبعا بالكوسه لان فيه ناس عايزينها واجهه يعملوا اللى هما عايزينه باسمها وما يظهروش
الفارس/والله كلامك حقيقى
صبحى/وام عيسوى عمال تصرخ وتنطر فى الرايحه والجايه الست دى خربت بيتى
اتلفارس/لا ولا يهمك دى زوبعه فى فنجان
صبحى/زوبعه مين دى الست بتقول كلام جامد قوى
الفارس/على رايك ما احنا فى زمن الحريم اليومين دول كل حاجه فى ايديهم
تدخل اى مصلحه حكوميه او غير حكوميه تلاقى عدد الموظفين اكتر من الرجال شىء غريب
صبحى/والسباب مشلاقى وظايف ولا رغيف العيش
الفارس/الجنس اللطيف برده يا صبحى لازم نعامله كويس ونخليه يركب ويدلدل رجليه اه امال هبه دى الديمقراطيه يا واد المراه نصف المجتمع
صبحى/على رايك دى بقت وزيره وسفيره ودكتوره واهم من الرجل كمان الشاب من دول يروح يقدم فى عمل يرفضوه وهيه لو راحت يقبلوها على طول
وكلمتها مسموعه وكمان بيدوها احسن مرتبات
الفارس/انت شايف المراه النهارده بقى لها وزنها فى المجتمع بقت كل حاجه وعايزين يمسكوها القضاء والماذونيه
صبحى/واخده حقوقها تمام والراجل ضايع وهو المظلوم فى العمليه دى
الفارس/راجل تانى ما خلاص ضاع زمن الرجال
صبحى/ولو انت عملت فيها حاجه كده والا كده تفضحك وتوديك فى داهيه وتدخلك السجن بدمعتين
الفارس/يعنى يا بنى عيش واسكت
صبحى/يعنى اعمل حمار حصاوى واخلى كيوتا تدلدل رجليها
الفارس/اه انت كده تمام اصل توديك فى داهيه وترجع مصر جعان وحافى
صبحى/امرى لله حسبى الله ونعم الوكيل
الفارس/كله من الديمقراطيه والحريه وزمن العولمه اللى فسدت فيه الذمم
صبحى/يعنى الكلام ده صح يا زعيم
الفارس/لا طبعا اكبر دمار للعالم كله
صبحى/ازاى
الفارس/المراه مالهاش الا بيتها وتربيه ولادها وتكوين اسره فاضله مسلمه وزى ما قال عمنا حافظ ابراهيم الام مدرسه ان اعددتها اعددت شعبا طيب الاعراق
صبحى/امال ايه اللى احنا فيه ده
الفارس/الغزو الفكرى يا حبيبى امال هيهززمونا ازاى
اصل عمليه الحرب العسكريه دى مكلفه
صبحى/على رايك
الفارس/شوف الاول حريه الزى ومالو ما تلبس جيبه قصيره ثم مينى جيب ثم صدرها يبان وتحط الاحمر والاصفر وعادى تشتغل مغنيه او راقصه اهو كله اكل عيش ودى عندها عيال هتعمل ايه يعنى شوفو انتم لها حل والتانى حريه الفكر تخالط الرجال وتبقى سفيره ودكتوره ووزيره وتروح اوروبا وكده يعنى انت فاهم طبعا واديك شايف ام عيسوى بتعمل ايه
صبحى/يعنى انت رايك ان المراه ما تطلعشى من البيت لا انت رجعى قوى يا زعيم
الفارس/طبعا انت خلاص بقى رحت الصين واتعلمت اللماضه بعد ما كنت بتنضرب هنا على قفاك
صبحى/لا يا زعيم انا برده خدامك
الفارس/شوف يا صبحى الرجعيه اللى المراه فيه اليوم من اهانه رغم انها وصلت لاعلى الدرجات
صبحى/طب انا عايز اقلب نفسى امراه افضل
الفارس/اهو ده اللى ناقص
صبحى/اعمل ايه ما دام المراه واخده كل حقوقها كده ومحدش بيقولها لا ليه متحولشى الى امراه
الفارس/برده وجهه نظر بس هنسميك ايه
صبحى/ام عيسوى
(واصبح للمراه قوه وصولجان وبقى الزمن زمن النسوان والرجل تايه مهضوم حقه يبكى على اللى عدى وكان ايام ماكان سى السيد ايام زمان واهو زمن وفات واضحكى يا ام عيسوى عماتى م الفسيخ شربات) 9(كوره--كوسه)
دخل صبحى غاضبا على الفارس وقال
صبحى/يا زعيم العالم اتجننت واتهوست
الفارس/عادى ماحنا فى زمن الجنون مش غريبه يعنى
صبحى/الجماعه بتوع الكوره دول جننوا الناس
الفارس/وايه يا بنى وداك لهم دول عالم غجر
صبحى/والله كنت فاضى وعديت على الاستاد قلت اتسلى
الفارس/سبحان الله وايه اللى فى راسك ده انت متعور
صبحى/اه م انا خدتللى طوبه فى دماغى كانت هتجيب اجلى والله يسترها كيوتا عملت ليه اللازم
الفارس/ربنا يسترها
صبحى/دول يا اخى عالم مجانين حته كوره جلد مجننه الناس
الفارس/رياضه يا جاهل
صبحى/وهيه دى رياضه دى قله قيمه
الفارس/عارف يا صبحى اللاعب من دول بياخد كام فى الماتش
صبحى/لا مشعارف
الفارس/مليون جنيه
صبحى/كام يا ساتر مليون جنيه ليه بيعمل ايه ده بيلعب
الفارس/امال لو شوفت بتوع بره بياخدو كام تقول ايه تنتحر
صبحى/كام يعنى
الفارس/ده فيه واحد بياخد فى الشهر بس مرتب 50مليون دولار
صبحى/ياه ده ايه ده ليه يعنى
الفارس/انت علنياتك يا صبحى
صبحى/معقوله ده الناس مش لاقيه رغيف العيش ودول بيكسبوا بالدولار
الفارس/يلى بقى اتجدعن وهات لنا عيل يلعب كوره ويبقى محترف فى البرازيل وياخد بالدولار او باليورو
صبحى/والله ده ظلم يا زعيم
الفارس/وهو فين العدل يا صبحى الدنيا دار عناء ومفيش عدل الا فى الاخره
صبحى/على كده بقى العالم بتوع الكوره دول احسن مننا
الفارس/مؤكد معاهم ملايين من الهوى وعايشين فى رغد ولا حملين هم بكره خالص
صبحى/طب ما يحدفولنا حبه فلوس من معاهم
الفارس/هتعمل بيهم ايه
صبحى/مشعارف
الفارس/شوف يا صبحى 50مليون دولار يبنوا دوله زى تنزانيا بجيش بحكومه بشعب
والمليارات اللى بياخدوها العالم دول يحلوا ازمات فى العالم العربى بتاعنا زى ازمه العيش والبنزين والبطاله ويحققوا الرفاهيه للمواطن الكادح الطيب الفقير ويحلوا ازمه الفقر والجوع وخلافه
صبحى/وازمه التعليم والفساد واى ازمه سببها قله الفلوس وعدم استغلال الثروه وعدم العداله فى توزيع الثروه
الفارس/لا انت تقدمت قوى وبقيت على المحك
صبحى/ده الوجه الجديد م الامبراليه وصناعه القرار وحكم الشعب
الفارس/الله يعينك يا صبحى
صبحى/الانسان التقدمى التوسعى اللى زىى لازم يباشر حقوقه الساسيه باهتمام ويقرر بناء مستقبله بنفسه
الفارس/انت لو معاك الفلوس دى كلها هتعمل ايه
صبحى/هعمل ليه دوله لوحدى اصل انا زهقت من الدول كلها
الفارس/مظبوط
صبحى/بس انا خايف من الانقسامات بعد كده وخلق جيل عسكرى مطهد
الفارس/زى بتوع الصومال والسودان
صبحى/اه
الفارس/لا متخافشى مانت هتمسك الحكم بقبضه من حديد
صبحى/حد عارف مصيره ايه
الفارس/على رايك
صبحى/بالمناسبه هيه الصومال فيها كوره برده
الفارس/طبعا بس كوره على شكل الكوسه
صبحى/ازاى
الفارس/ددول فالحين بس فى انشاء كتائب مسلحه يحاربوا بها بعض
صبحى/الواحد بيتعجب من الجماعه دول عمرهم كله فى حرب
الفارس/دول هدفهم تطبيق الشريعه يا غبى
صبحى/وهيه الشريعه اصلا قالت لهم ادبحوا بعض عشان تطبقونى والا قالت مينفعشى تطبقونى الا ما تدبحوا بعض
الفارس/كل ما فصيل منهم يوصل للحكم يطلعله خازوق يقول انا احق بالحكم ويحاربوا بعض
صبحى/والمشكله كلهم بيتكلموا فى الدين وان يعن هدفهم تطبيق شرع الله
الفارس/ماهى دى الموضه الاسلام هو الحل
صبحى/طب ما احنا عارفين انه الحل من غير قتل ومعارك
الفارس/انت عارف هما بيعملوا كده ليه فى بعض
صيحى/ليه
الفارس/ عشان الفقر والجوع والامراض تركبهم ويموتوا شهداء
صبحى/لا معقوله
الفارس/ايوه جهاد من نوع جديد
صبحى/ده انا شفت طفل صومالى عضمه باين من لحمه
الفارس/سياسه الجوع دى ادمنوها وكله من اجل الدفاع عن الشريعه
صبحى/واخبار كوسه السودان ايه
الفارس/لا هينفصلوا عن بعض عافيه والبشير ضعيف مسكوه الحكم وضحكوا عليه
صبحى/وفى الاخر هيلاقى نفسه حاكم على قريه مكونه من الف فرد
الفارس/ادى اخره ادمان السلطه اصلها مرض
صبحى/والله ده لو راجل يسيب لهم الدنيا ويروح يعيش باقى عمره فى الحرم
الفارس/ومين سمعك حد يطول
صبحى/يا اخى دول عالم فاكرين نفسهم مشهيموتوا
الفارس/لا الحكام دول ما بيموتوش وبعدين معاهم حصانه
صبحى/ربنا يسترها الواحد مشعارف اخرتها ايه
الفارس/لبن انشاء الله
صبحى/انا بقى همشى يا زعيم اصل كيوتا تطردنى من البيت
الفارس/ياه انت بتخاف منها كده
صبحى/لا مش الفكره انا عندى انضباط والتزام بالمواعيد
الفارس/شكلك يا صبحى اتعملك مربط زى الحمار
صبحى/لا يا زعيم انا برده صبحى الحمش بس العمليه فيه شىء من الديمقراطيه وحوار الحضارات
الفارس/تمام
صبحى/اصلها بتقلق عليه وبتخاف عليه قوى حب بقى وكلام من اده
الفارس/ماشى خلى بالك من نفسك يا صريع الغوانى يا محطم قلوب العذارى
صبحى/بس انا برده مصمم انى لو انجبت ولد يلعب كوره ويبقى محترف فى البرازيل
الفارس/بس بشرط ما يروحشى الصومال ليقتلوه ويقولولك ده خالف الشريعه
(وبدا عهد جديد من الجوع وسياسه التشريد وكله انشاءالله يفوت فى الحديد بس المهم العزيمه وعمل وليمه على روح زمن الصراعات اللى عمرنا مهنشوف زيه الا فى الحكايات)
10الراقصه نعيمه زمبلك)
وقفت الراقصه ذات الخمسين عاما فى صاله الرقص المعتاده فى شارع من شوارع الهرم العتيده فى تاريخ الرقص والهلس وفى تتبع فنون المسخره وقله الادب المتوفره تتمايل بدلال وتغنى اللحن القديم المتوارث شعبيا عند السوقه وبياعين الكلام اللى لهم مستقبل فى الهيافه ولهم تاريخ فى فن الكيف ( لا والنبى يا عبده) والجمهور المخمور يتمايل مع زمبلك فى دلع وفرفشه وسى عبده الله يستره يدندن بالعود مرددا تانى يا ست والنبى من تانى الحته دى وجميع من فى الصاله نازلين عليها فلوس من كل ناحيه وهيه تتمايل وتمط فى صوتها وتدلدله
لا والنبى يا عبدووووووووه
عادت للبيت بعد سهره معتاده محمله بالمال والذى منه بعد ما جسمها التقيل ما نهشته العيون والايدى لعبت فيه قابلها الزوج المسطول
الزوج المسطول / كنتى فين كل ده يا هانم ..؟؟؟؟
زمبلك /هكون فين يعنى ..؟؟؟؟؟؟؟!!!! ما نت عارف فى الكباريه الزفت بتاع كل يوم
الزوج / لااا مهو مش عادتك أتاخرتى النهارده ..؟؟!!
زمبلك / يعنى اعمل ايه اقول للنعمه بلاش وللفلوس مش عايزين...؟؟؟؟؟؟!!!!!!!!!!!!!!!!
الزوج / لاااا .. مشقصدى
زمبلك / امال أنت هتاكل منين ..؟؟ والعيال هيلبسوا وياكلوا منين .. ؟؟؟ ده أيه العيشه اللى تقرف دى ...!!!
الزوج / انتى صوتك بيعلا عليه يا زمبلك..؟؟؟؟؟
زمبلك / عتريس .... خلى ليلتك تعدى على خير ..أنا مصدعه انا هالاقيها منك ولا من الزباين..؟؟؟!!!
الزوج / مانتى اللى عايزه كده ..؟؟
زمبلك /عايزه أيه ..؟؟ دنا مستحمله القرف ده عشان العيال والعيشه الهباب اللى انا فها غصب عنى واحده زيى عندها خمسين سنه تعمل اللى انا بعمله ده ليه ..؟؟؟!!! وكفايه انى مستحملاك وبصرف عليك أنت و8عيال ..أعمل أيه اكتر من كده ..؟؟!!!
عتريس/ انتى بتعيرينى يا زمبلك ..؟؟!!!
زمبلك / ولا تعايرنى ولا اعايرك الهم طايلنى وطايلك ...!!
عتريس/ وايه اللى غصبك على المر ..؟؟؟؟
زمبلك / اللى أمر منه .....
وكفايه انى مستحملاك ...راجل بصباص مخمور سكرى
عتريس / انا اتجوزتك ولميتك من الشوارع .. وانتى كنت ممسوكه فى قضيه دعاره ولا هتنسى ..؟؟
زمبلك / فاكره يا سيدى بس هعمل أيه أمى كانت بتموت أعمل لها عمليه منين
عتريس/ تقومى تمشى فى الحرام ..؟؟؟
زمبلك / كله كان بينهش فى لحمى ....
عتريس/ انا نضفتك ولميتك وعملت منك فنانه كبيره وراقصه محترمه ده جزاتى ...؟؟؟؟
زمبلك/ بلا خيبه ..!!!
عتريس/ والراجل المليونير اللى انتى قتلتيه وسرقتى فلوسه فاكره ....؟؟؟؟؟؟
زمبلك / عتريس كفايه ....
عتريس/ والا الظابط اللى كان هيموت عليكى ورحتى معاه وبعتينى وانا اللى نضفتك وعملت منك شىء .....
زمبلك / عتريس خلى ليلتك تعدى شوف يا حبيبى دول الفين جنيه شبرق بيهم نفسك ..
عتريس/ الفين جنيه بس ..!!!!
زمبلك / انا لميت المحصول كله النهارده وانت خته عشان تعرف انى بحبك
عتريس/ ايوه كده نسوان متجيش الا بالضرب والتهزيق
زمبلك / بكره عندى فرح عايزه انام
عتريس/ بكام وفين ؟؟؟؟؟
زمبلك / فى السيده زينب وبخمس تلاف
عتريس/ خدى معاكى الواد حوده الطبال هو سكرى حبتين بس معلم وزوديلوا المعلوم
زمبلك / ماشى
عتريس/ ومتشربيش قبل ما تطلعى خديلك بس حجرين حشيش
زمبلك/ ماشى
عتريس/ السيده زينب حى شعبى متغنيش الا اغانى شعبيه وبلاش الحزن
زمبلك / ماشى
عتريس/ والبسى بدله رقص مفتحه من تحت عشان العيون تهيص واثبتى على المسرح وقربى من الزباين قوى
زمبلك / ماشى
عتريس/ والواد سفروت خليه فى ديلك ده واد تمام بيلعب بالاورج لعب ومحبوب
زمبلك / خلاص بقى انا عايزه انام
عتريس/ خشى نامى
زمبلك / عتريس خلى بالك من العيال فطرهم ومشيهم على المدرسه وحميهم ولبسهم كويس والواد بركه زودلو المصروف اصل نجح وشاطر والبت فتحيه هات لها تاكسى تروح به الجامعه
عتريس/ ماشى
زمبلك / وامين اللمض خلى بالك منه وعلمه يركب الحصان كويس
عتريس/ ماشى
زمبلك / ومحمود وجمال التوام دول اشترى لهم عربيه النهارده انا وعدتهم عشان يروحو الجامعه بها
عتريس/ امرك
زمبلك / والواد اللبلب نجيب خلى بالك منه اصله مستعفى نفسه على العيال لا يعمل لنا مصيبه
عتريس/عرفنا يا ستى يلى بقى نامى عشان تقومى فايقه للفرح
زمبلك/ تصبح على خير يا حبيبى
(وتذهب السيده زمبلك لتغط فى نوم عميق بعد سيل من التعليمات وكتر المكسرات وتتوه المعانى الجميله فى وحى الرزيله ويبقى للشيطان قبيله وللفجور عيله وللتوهان صولجان وكله باسم زمبلك وزوجها عتريس الفنان) 11(فتوى اهدار دم البرادعى والقرضاوى وغلاء الاسعار)
نظر صبحى للفارس العربى وقال
صبحى/تصدق ان كيلوا اللحمه بتسعين جنيه
الفارس/ياه هى الحمه غليت كده اصل انا عامل اضراب عنها من زمان
صبحى/امال وكيلو السكر بقى ب8جنيه
الفارس/حتى السكر راح فى داهيه كده
صبحى/ده البطاطس كمان عمال تغلى وترخص
الفارس/وفيه ايه رخيص يا صبحى الا البنى ادم
صبحى/طب ليه الغلا الفاحش ده يا زعيم
الفارس/سياسه تعويم الجنيه ودتنا فى داهيه
صبحى/تعويم الجنيه يعنى ايه
الفارس/بالبلدى كده ان الجنيه ما لوش لازمه
صبحى/اصل احنا بنتعامل بالدولار
الفارس/مهو عشان كده عمولتنا مالهاش قيمه وبتنضرب بالجزمه
صبحى/بس انا شايف ان فيه مظاهرات واضرابات كل يوم
الفارس/زوبعه فى فنجان وكلام فاضى والحكومه شايفه وساكته
صبحى/انا حاسس ان فيه ناس مصره ان البلد تكون متاخره كده على طول والفساد ياكل فيها
الفارس/طبعا امال يعيشوا ازاى فيه ناس بتعمل ثروه من الفساد ده
صبحى/انا هزهد فى الدنيا واعمل زى الجماعه المتقشفين واعيش فى جبل والا مغاره
الفارس/وهو ده حل يعنى
صبحى/ما احنا عمال نواجه الفساد اهو وغيرنا عمال يقولو ويعيدوا ومفيش فايده
الفارس/عشان مفيش نظام ولا قدوه ولا اجنده عمل ولا وحده
صبحى/الكل بيضرب فى بعضه
الفارس/ربنا يعديها على خير
صبحى/سمعت اخر خبر يا زعيم
الفارس/خير مانت بتحب الفضائح
صبحى/الشيخ اللى افتى باهدار دم البرادعى
الفارس/اه يا سيدى ده كله كلام القصد منه الشهره والدعايه
صبحى/ده بيقول ان لازم البرادعى يتقتل وكمان القرضاوى لانهم يدعون للفتنه ويطلب من الرئيس قتل القرضاوى والبرادعى وبيقول ان لابد يعدموا لانهم يدعون للعصيان المدنى والثوره على الحكم والاوضاع
الفارس/طبعا بيشكر فى الحكومه والنظام
صبحى/اه بيشكر فى الحكومه والحكم والنظام بطريقه فيها توسل
الفارس/طبعا شوف يا صبحى اللى زى دول بيدوروا على الشهره والحمايه وبيكونوا اصلا مرضى نفسيين
صبحى/اللى يغيظ يا زعيم انه بيشكر فى النظام قوى وبيدافع عنه
الفارس/اصل البرادعى والقرضاوى خطفين الاضواء اليومين دول بالكلام عن التغيير ونبذ الفساد وده فعلا اكبر شىء هام لازم نتخلص منه
صبحى/انا مندهش طب ده شيخ ورجل دين ايه حشره فى الساسه
الفارس/طول عمر السياسه بتخرب الدين ولما الساسه تدخل فى الدين تفسد الاخلاق
صبحى/وبعدين الشيخ اللى افتى بقتل البرادعى والقرضاوى افتى على اى اساس من الدين
الفارس/المزاج بتاعه كان عايز كده ولكل فتوى دليل عنده
صبحى/يا سلام يعنى القرضاوى فى لحظه بقى كافر ومهدر الدم سبحان الله
الفارس/وفى لحظه بقى الشيخ سياسى محنك ومدافع عن النظام المصرى والحكومه اللى كل يومبتذل فى الشعب ومضيعه حقوقه وبتسرقه وبتنهب قدراته وماله وحياته فى لحظه بقى الشيخ بيدافع عن الحكومه وبقى من اعوانها
صبحى/سبحان الله شىء غريب
الفارس/ربنا يهدى يا صبحى
صبحى/والله يا زعيم انا هبعت للشيخ الله يستره مطالبى واول المطالب ان اللحمه ترخص والسكر يبقى الكيلو بجنيه ويجيب لنا مياه حلوه ويعمل لنا مجارى ويمنع الفقر والبطاله ويشغل العاطلين ويرفع المرتبات ويمنع الفساد ويولع فى شوارع الهرم ويصدر فتاويه الحلوه باهدار دم فيفى عبده وباغلاق محلات الخمور والكباريهات ومعاقبه حراميه الاراضى والبنوك واعدام المرتشين والفاسدين والرقاصين ويساعدنا فى الازدهار والرقى والتقدم
الفارس/يلى روح يا حبيبى قدم له مطالبك وانا واثق انه هيساعدك
(وذهب صبحى مسرعا لعرض المطالب واصر انه افضل يبات مغلوب مش غالب مسلسل مكرر كل يوم فى قالب) |
| |
|
| |
| |
|
|
| |
|
| |
|
| |
|
| |
|
| |
ليست هناك تعليقات:
إرسال تعليق